Şəkillərdə gördüyünüz bu yer Balabəyin evidir. 1893-cü ildə inşa edilmiş bu bina Bərdə rayonunda yerləşir.

Binanın sahibi Bala bəy Qəhrəman bəy oğlu Tağıbəyov 1887-ci ildə Cavanşir qəzasının Saatlı оbasında anadan olmuşdu. İbtidai təhsilini molla yanında almış, sonra Şuşa Real məktəbini bitirmişdir. Dövlət idarələrində məmur işləmişdir.

Onun Bakı, Tiflis və Peterburqdakı banklarda şəxsi hesabları var idi.

Bala bəy Tağıbəyov Üzeyir bəy Hacıbəyovun Zaqafqaziya (Qori) Müəllimlər seminariyasına təqdim etdiyi bəylik arayışını təsdiq edənlər arasında olub.

O, Sovet dönəmində Tağızadə soyadını daşıyırdı.

Bala bəy Bərdə şəhərinə köçmüş, 1893-cü ildə burada özünə böyük bir ev tikdirmişdi. XIX əsr bəylərinin yaşayış tərzini əks etdirən 2 mərtəbəli əzəmətli bina 12 otaqdan, 2 foyedən, 5 eyvandan və yardımçı otaqlardan ibarətdir. Həyətyanı sahəsi 1,5 hektar, binanın sahəsi isə 396 kv.m-dir. Hər otağın divarında kömür sobaları yerləşir. Rus əsilli ustalar tərəfindən alman üslubunda tikilmiş evin tikintisi zamanı işlədilən materiallar ölkəmizin bəzi rayonlarından və Gürcüstandan gətirilib. Evin kanalizasiya xətti xüsusilə diqqəti cəlb edir.

Meşənin kənarında, yaşıllıqlar qoynunda, füsunkar bir ərazidə qırmızı kərpicdən inşa edilən bu malikanə elə tikilib ki, günəş şüası onu hər tərəfdən tutur.

Bala bəy Tağızadə Azərbaycanda Sovet hakimiyyəti qurulduqdan sonra mülkünü dövlətə bağışlayıb.

Bala bəy Tağızadə sağlığında var-dövlətindən, şəxsi nüfuzundan xalq üçün, millət üçün də istifadə edib. Lakin sovetin diktatura maşını ondan da yan keçməyib. XX əsrin 30-cu illərində bu xeyirxah insana yalnız “bəy” adını daşıdığına görə 10 il iş kəsiblər. Qolçomaqlıqda ittiham edilən Bala bəy sürgün edilir. Özü sürgün edilsə də, malikanəsi gözdən yayınıb, dağıdılmayıb. Bala bəy Tağızadənin tikdirdiyi bu bina yerli əhəmiyyətli memarlıq abidəsi kimi 9 saylı invertar kimi qeydiyyatdadır.

Hazırda eyvanları və otaqların döşəmələri qəzalı vəziyyətdədir. Divarların vəziyyəti qənaətbəxşdir. Geniş həyətyanı sahəsi var. Evdə təmir-bərpa işlərinin aparılması zəruridir.